En Engel namens Schorsch

E klääni Woihnachtsgschicht
zum Lukas soiner Woihnachtsgschicht

Ob s Engelcher gebt, wääß mer nit so genau.

In de Woihnachtsgschicht, do gebt s se. Do sin se iwwer de Schoofhirt uf em Feld vun Bethlehem gschwebt un hän gsunge. Ganz laut hän se gsunge. "All die Ehr vun de Welt soll unserem Herrgott soi drowwe im Himmel, un Friede soll oikehre bei de Mensche uf dere Erd, die wo so sin, wie unsern Herrgott se hawwe will." So hän se gsunge. Un sie hän s geglaabt, die Engel, un deswege hän se so schää gsunge.

Bloß ääner, so en klääner, Schorsch hot er, glaab ich, ghääße, der hot uf emol oighalde un hot nimmi mitsinge wolle. Weil, er hot iwwer m Sing nunnergeguckt uf die Erd, un do is er gewohr worre, was sich do alles abspielt. Er hot gsehe, wie die zwää arme Leit dort ehr Mieh ghat hän, dass se en Platz finnen, wo se fer die Nacht bleiwe kännen. In eme Stall sin se dann unnerkumme, in eme armseliche Stall. Un des, wo die jung Fraa ehr Kind kriegt hot. S hot schoint s kääns e Erbarme ghat mit dene zwää arme Leit. Un die Schoofhirt hot er gsehe, wie se verlumpt un verloddert in dere Nacht bei ehre Herde uf em Feld gstanne hän. Ganz allää draus uf em Feld, kää Dach iwwerm Kopp, nix wie e dinni Supp in em Dibbe uf em Feier. Un s Feier war ach schun am Ausgehe.

Do is em alles des oigfalle, wo er schun gsehe hot. Mord un Dotschlag, Hännel un Zores, wo mer hieguckt uf dere Welt. Kaum ääns verdragt sich mit em annere. Un wann se sich schun emol verdrage dun, dann dauert s nit lang, bis se sich widder in die Hoor kriegen. Des is so dehääm, in de Heiser, un des is so in de ganze weide Welt. Kääner gennt em annere, dass er be bissel meh hot als wie er selwer. De änd nemmt de annere aus, un s fehlt als nit viel, do schlacht er de annere dot. Die Velker fiehren Krieg unnernanner. Wo mer hieguckt Lug un Trug.

Do soll mer schäne Lieder singe, vum Friede uf dere Erd un dodevun, dass mer soin Herrgott lowe kännt? "Nää", sagt er sich. "Nää, do machscht nit mit. Des is nix fer dich. Wo doch doi Lewe lang ufrichdich gewest bischt, do duscht dich jetzt nit verbiege, nit emol an Woihnachde." Un er hot s Maul zsammegepetzt un is still gewest.

Bis en soin Nochber, de Jakob, gstumpt hot, wo newer m im Engelschor gsunge hot. "He, warum singscht en nimmi mit? Kannscht des Lied nimmi?" Do hot er n am Ärmel gschnappt un hot en uf die Seit gezoge un hot em gsagt: "Ich glaab, du verstehscht nit viel vun dere Welt. Guck dich doch nor mol um. Dann bleibt der ach der Gsang im Hals stecke." Un er hot em verklickert, wie er des määnt.

Do is der anner awwer uugeduldich worre. "Nää," hot er zu m gsagt, "so derfscht des nit sehe. Mer singen nit, weil alles schun so is, wie s unseren Herrgott hawwe will. Mer singen, weil unsern Herrgott sich ufgemacht hot in soi Welt. De Herrgott selwer will des zurechtbringe, was dort so verquer un letz is. Dewege kummt des klää Bobbelche dort uf die Welt. Un deswege singe mer des schääne Lied. Weil, mer wissen: S bleibt nix so, wie es is. S werd hell in dere Welt, un die Mensche wern noch die Kurv kriege, dass se sich ach verdrage kännen."

Do hot der klää Engel, s werd en Pälzer gewest soi, weil er sich nix hot vormache wolle, do hot der klää Engel noch emol zugheert, was soi Engelskolleche do singen: "All die Ehr vun de Welt soll unserem Herrgott soi drowwe im Himmel, un Friede soll oikehre bei de Mensche uf de Erd, die wo so sin, wie unsern Herrgott se hawwe will."

Un er hot bei sich gedenkt: "Des kännt jo soi, dass die Welt sich noch emol ännert. Wann s unsern Herrgott schafft, dass er ebbes ausrichde kann bei de Mensche uf dere Erd. Mer wääß es nit, awwer s kännt jo soi. Un dann wär s nit gut, wann ich jetzt ufheere deet mit em Singe."

Un wie er sich des so gedenkt hot, do waren die Engel ferdich mit em Singe un ehrn Aafiehrer, de Gabriel, hot en gsagt: "So, die Node weggepackt un es Buch zsammegeklappt. Un nix wie los, iwwer die ganz Erd weg, iwwerall hie, in de letschde Winkl. Iwwerall missen er e bissel ebbes vun dem Lied hiebringe. In jedi Menscheseel. Un strengen eich aa, singen, mol laut un mol ganz leise, unser Lied. Dass es sich in s Ohr vun de Mensche oischleicht un ins Herz. Dass se s nimmi aus em Sinn kriegen. Dass se alsfort draa denken, was unsern Herrgott mit en vorhot."

Un de Schorch war de allererscht, wo losgfloge is. Weil, des war jetzt ebbes noch soim Gschmack. Nit nor schää singe drowwe im Himmel in em Engelschor. Nää, werklich ebbes du, wo ebbes nitzt. Losfliege zu de Mensche un e bissel vum Himmelsduft zu ne nunnerbringe in die Menschewelt. Dass se ebbes spieren vun unserm Herrgott soim Glanz. Un dass se e bissel Häämweh kriegen noch em Himmel. Un, des war fer de Schorsch es wichdigschde: dass se sich dann selwer uf de Weg machen un guggen, dass se die Welt annerscht machen, als wie se is.

Un all die Engel sin losgfloge. Die, wo noch e bissel heeher waren, sin nunnergfloge uf die Erd, dass es gerauscht un gebraust hot in de Luft.

Mit ehre brääde Fliggel dun se seither iwwer die Erd fliege, un mer dut s alsemol spiere, en Luftzug dut em alsemol ufscheiche, un alsemol bringt er em ganz dorchenanner. Vor allem korz vor de Woihnachde. Do spiert mer se meh als wie sunscht.

Un wann em dann so en Luftzug vun so me Engelsfliggel streift, dann werd es Herz e bissel wääch, un mer hot e bissel meh als wie sunscht acht uf die anner Leit newe em. Un mer lacht e bissel meh wie sunscht, un mer helft sich unnernanner e bissel. Mer guckt, wie mer sich e Frääd mache kann. Un wammer genau hieguckt, merkt mer: Die Welt werd e bissel so, wie unsern Herrgott se hawwe will.

Un mer gebt dem Schorsch e bissel recht. So ganz verkehrt is es nit, wammer mit dem Engelschor singe dut: "All die Ehr vun de Welt soll unserem Herrgott soi drowwe im Himmel und Friede soll oikehre bei de Mensche uf de Erd, die wo so sin, wie unsern Herrgott se hawwe will."

Ob s Engelcher gebt, wääß mer nit so genau. Awwer den Schorsch, den gebt s. Bstimmt.

(Werner Schwartz, nach einer Idee von Werner Reiser)

Pfarrer Dr. Werner Schwartz
Evangelische Diakonissenanstalt, 67343 Speyer am Rhein
w.schwartz@ev-diakonissenanstalt-speyer.de