Num 11,11f.14-17.24f
De Mose hot zum Herrgott gsacht: "Warum machscht du mer soviel Kummer? Un warum guckscht dann nit emol freundlich uf mich runner? Warum legscht du mer die Lascht vun dem ganze Volk uf mich? Hab ich dann des Volk wie moi Kind gkriegt, daß du zu mer sache känntscht: Trag s uf doim Arm, wie e Kinnerfraa e Kind tragt, in des Land, wo du ehre Vädder versproche hoscht? Ich schaff s nit, ich kann des Volk nit allää trage, s is mer zu schwer. Willscht du s awwer wieder mit mer so mache, dann schlag mich liewer dot, wann du mich schun nit freundlich aagucke kannscht, daß ich wennigschdens nit moi eigenes Uuglick sehe muß."

Un de liewe Gott hot zum Mose gsacht: "Sammel mer siebzich Männer aus de Äldeschde vun em Volk Israel, sone, vun dene wo du wääscht, daß se Äldeschde im Volk un Amtsleit sin, un bring se vor die Stiftshitt un stell se dort vor dich hie, dann will ich runnerkumme un dort mit deer redde. Un ich will vun doim Geischt, wo ich deer gewwe hab, nemme un will en uf die siebzich Leit lege, daß se mit deer die Lascht vun dem ganze Volk draache kännen und du se nit allää draache muscht."

Un de Mose is rausgange un hot em Volk gsacht, was de Herrgott zu em gsacht hot, un er hot siebzich Männer aus de Äldeschde vum Volk zsammegsucht und hot se rings um die Stiftshitt gstellt. Do is de Herrgott in ner Wolk runnerkumme un hot mit em Mose geredt un hot vun dem Geischt genumme, wo er em gewwe ghat hot, un hot en uf die siebzich Äldeschde gelegt. Un wie der Geist uf en gewest is, do sin se ganz aus em Heische geroode, wie wann se Prophede wären, un hän nimmi ufgheert.

Ehr liewe Leit in ...

Wie s in de Wiescht is, des wääß mer bei uns do nor aus em Film oder aus em Karl May, wammer den frieher mol gelese hot, wammer nit grad schun emol e Rääs in die Wiescht gemacht hot. Wiescht, un kää End. Nor Sand un Himmel un e paar Planze, wo mer nit genieße kann. Kää Wunner, daß em dort de Mut verloßt. Schun gar, wann noch en langer Weg vor em liegt. Nit nor Minudde oder Stunne, nää, Johre un Johre.

So lang schun hot de Mose es Volk Israel dorch die Wiescht gfiehrt. Johre um Johre, am End warn s verzich Johr. Un was hot er en versproche ghat! Weg aus de Sklaverei, weg aus Ägypde, fort, ins gelobde Land, wo Milch un Honig fließen. In ehr eigenes Land, wo mer sich dehääm fiehle kann. Un sie deeden dort in Städt wohne un Hannel treiwe un e gudes Lewe hawwe fer all die Dage, wo de Herrgott en gebt.

Un jetzt? Sand, Wiescht, e Sunn, wo alles versengt, kaum ebbes zu nage, immer es selwe: Manna, Manna un nix wie Manna. So e komisches Harz, wo vun de Streicher fallt. Gut, s fillt de Mage, s helft, daß mer iwwerlewe kann, awwer s schmeckt noch nix. Des Manna, des hän se satt ghat. Sie hän s kaum noch sehe känne un kaum noch rieche känne um kaum meh runnergebrocht. Wann se des jetzt schun seit Johre erlewen, wie werd dann erscht die Zukunft werre!

Vun do is de Weg nit weit, daß die Gedanke zurickwannern, daß mer iwwerlegt, wie s frieher gewest is. Do war s jo in Ägypde fascht besser. Wärn se nor nit losgezoge, nor nit dem Mose gfolcht. Dort hot Fisch gewwe, Kirbiß, Melone, Laach, Zwiwwle, Knoblaach. S laaft em s Wasser im Mund zsamme, wammer dodraa denkt, an die Flääschtöpp in Ägypde.

Un jetzt: Wiescht, soweit wie mer gucke kann. Immer es selwe, Staab un Hitz un grad mol es Allerneedigschde zum Esse. Wo soll mer do soi Kraft hernemme, fer weiderzulaafe? Uf was soll mer do waade? Wie soll mer do sich e Ziel vor Aache halde: s gelobde Land, Milch un Honig, uf ner safdiche Wiss beim frische Wasser soi Laacher ufschlache. Wo mer doch nor Wiescht sehe kann, wo mer nor Manna zu beiße hot, un de Weg geht endlos wieder, dachoi, dachaus immer es selwe Elend.

2

Wieschde un Wieschdezeide. Mer kännen se uns vorstelle, ehr un ich. Mer hän se erlebt. S gebt se, midde in unserm Lewe. Sellemols, vor gut fuchzich Johr, gleich noch em Krieg. S waren droschtlose Zeide. Ohne jeden Glanz. Hamschderfahrde hot mer mache misse, daß mer iwwerhaupt ebbes zum Esse kriegt hot. Mer hot sich werklich nix leischde känne. S war schwer genuch, iwwerhaupt iwwer die Runde zu kumme, iwwerhaupt zu iwwerlewe. Erinnern ehr eich? Wieschdezeit. Was e Glick, daß sellemols en Weg rausgfiehrt hot, raus ins gelobde Land, in bessere Zeide, ins Wertschaftswunner, wie mer dann gsacht hot. Die Laschde sin leichder worre.

Oder sin s nor annere Laschde worre? Alsemol, wammer so zurickgucken, sieht s so aus. Annere Laschde. Nimmi en Kampf fer zum Iwwerlewe, awwer en annere Kampf. En Kampf um des oder sell, do e Stickel Glanz, dort e bissel Luxus. Awwer der Kampf is weidergange, un er geht wieder. Die Wiescht, wo s nix gewwe hot, liegt hinner uns, un mer sin midde in äner Wiescht, wo s schier alles gebt, was es Herz begehrt, un mer muß alles hawwe, immer meh hawwe, un des macht ach nit zufriede. Des noch hawwe un selles noch un schaffe un werkle, un mer kummt außer Odem dodriwwer. Un alles, wo mer hot, gebt em doch nor so en schale Gschmack im Mund, un des bissel Glick, wo mer spiert, halt nit lang vor. Kaum hot mer s ääne, do hot mer schun widder Luscht uf s nächschde, meh un immer meh un immer ebbes anneres.

Do hot mer zwar genuch zum Essen un zum Lewe un zum Aaziehe, un mer hot e Dach iwwerm Kopp. Des, wo mer sich sellemols denoch gsehnt hot, is jetzt ganz selbschtverständlich. Un wie s Gewidder hämmer e anneri Sehnsucht in uns. S geht uns jetzt um e bissel Luxus, um e bissel meh, wo mer zwar nit zum Lewe braucht, awwer wo mer määnt, s deet s Lewe schäner mache. Mer wollen fortfahre, Rääse mache, Urlaub, immer wieder fort, immer verrickder. Kuldur wolle mer genieße, immer meh. Un immer schneller wechseln die Mode.

Awwer fiehrt uns der Weg aus de Wiescht raus? Oder nit immer viel weider noi? Ich denk do an die, wo in unsrer Gsellschaft freigsetzt werren vun de Ärwet. Oder an die, wo iwwerhaupt nit noikummen in e Ärwet, vun der wo se sich ernähre kännden. Vielleicht weil zuviel verlangt werd, weil mer zuviel känne muß, weil mer flexibel soi muß bis zum Gehtnimmi, weil mer immer Spitzeleischdunge bringe muß un e Spitzegsundheit vorweise muß. Oder ich denk an Mensche, wo aus em Gleis geworfe worre sin, weil se nit hän mithalde känne, weil se Schicksalsschläg gedroffe hän, weil se krank worre sin, weil se s hän verkrafde misse, daß se sich hän drenne misse. Un des hot ääfach ehr ganzi Kraft verbraucht. Un sie sin aus em Lewe vun dene annere ääfach rausgerutscht.

Ich denk an Mensche, wo uf äämol nimmi kännen in ehrm Lewe, in dene wo s ganz leer worre is, un sie sehen kän Sinn meh in ehrm Lewe, kän Sinn meh in dem allem, wo um se rum bassiert. Immer schneller dreht sich des Rad, immer farwicher un greller werd die Welt. Soll des es Lewe soi? Soll mer so Erfillung finne? Un dann kummen noch Krankheide dezu, Kadaschdrophe bassieren, große und kläne, un wann s ach nor ganz privade Kadaschdrophe sin. Mer werd älder, de Dod rickt neeher. Wieschde un Wieschdezeide in unserme Lewe. Un s gebt kaum en Ausweg, s gebt kaum en Schimmer vun Hoffnung, nix, wo sich ebbes am Horizont abzeichne deet.

Wie sellemols, wo des Volk Israel dorch die Wiescht hot laafe misse. Ach wann die Exischdenz sicher is, ach wann s Manna vum Himmel fallt, die Lascht bleibt doch, un jedi un jeder is allää, selbscht wann s allminanner ähnlich geht un wann se all unner deselwe Probleme leiden.

3

Manchmol, do murre mer, wie die Israelide sellemols, un mer waaden uf äner, wo die Zeide ännert, wo die Welt umkehrt un se widder ganz un heil mache dut.

Wie war s sellemols dann bei dem Volk Israel in de Wiescht? Der Mose halt des nimmi lang aus, des Klaache un Murre vun soine Leit. "Geb un Flääsch, wie mer s in Ägypde ghat hän. Warum hoscht du uns nor do rausgfiehrt in die Wiescht?" Er wääß sich kän Rat meh, der Mose. Er deet am liebschde den ganze Beddel hieschmeiße. Sollen se doch grad bleiwe, wo se wollen. Ich will nimmi.

Do bassieren zwää Sache. S Ääne: De liewe Gott heert, wie des Volk klaacht, un er versprecht en, daß er en Flääsch gewwe will. Wachtle zu dem Manna dazu. E Flääsch, wo ganz orntlich schmeckt. Daß halt nit nor de Hunger notdirfdich gstillt is, nää, daß die Mensche ach ebbes hän, wo sie genieße kännen, midde in de Wiescht. Daß se de Mut nit ganz verlieren un daß se wenigschdens mol en Vorgschmack hän, en Vorgschmack uf es gelobde Land, uf des wo se waaden.

Un es Zwädde: Midde aus dem Volk, wo kaum ääner meh Mut ghat hot un Hoffnung, wo se s fascht all schun ufgewwe hän, daß se sich uf bessere Zeide frääen, midde aus dem Volk holt sich de liewe Gott Männer raus, dene wo er soin Geischt gebt. Siebzich sin s, e Zahl, wo määnt: viel, allminanner, zusamme wern se s schaffe. Allminanner gebt er soin Geischt. Speeder kummen noch zwää dezu, wo im Laacher zurickgebliwwe waren, Eldad un Medad. Ach die sollen unserm Herrgott soin Geischt kriege, also allminanner un noch meh. Nit de Mose allää. Allää kann er s wahrhafdich nit ausrichde. Er braucht Leit, wo em mithelfen, wo en unnerstitzen. All missen se mitdue. Allminanner mit all ehrer Kraft un all ehre Gaawe, allminanner missen se mithelfe, dann kann bassiere, was die liewe Gott will.

Die siebzich ziehen los, un sie stehn ehrm Herrgott visavis. Un dann kummen se ganz begeischdert ins Laacher zurick. Jetzt hän se widder e Ziel vor Aache. Un des steckt aa, des steckt all die annere aa, wo zurickgebliwwe sin. Wo se kän Mut meh ghat hän, do kriegen se widder Mut. Sie spieren, do wachst e neii Kraft in uns. Un sie kännen ehrn Weg unner die Fieß nemme, un unserem Herrgott soin Gesicht geht mit en. Sie hän widder e Ziel. Dodruf kännen se zugeh. Sie missen jetzt nimmi bloß an die gut alt Zeit denke. Sie dräämen nimmi bloß vun de Flääschtöpp in Ägypde. Sie wissen: Minanner schaffe mer s. Un sie wern frei vun dene falsche Getze, an dene wo se hän feschthalde wollen. En neier Geischt loßt n schiergar Fliechel wachse.

Mit dene siebzich fangt s aa. Un s greift iwwer uf allminanner. E kläänes Pingschtfescht dort, midde in de Wiescht. Unserm Herrgott soin Geischt kummt iwwer e paar Mensche und holt se raus aus ehrer Verzweiflung. Wo se kän Weg meh gsehe hän, do gebt er en neie Mut. Er gebt en Hoffnung, un sie fangen aa, daß se widder noch vorne gucken. Er molt en e Bild vun ehrm Heil vor die Aache. Un er schickt se uf ehrn Weg.

Fascht so wie speeder dann des Pingschtfescht fer unserm Herr Jesus soi Jinger in Jerusalem. Nit de Kopp hänge losse. Nit em Vergangene nor nochdraure, nit die Hoffnung ufgewwe. "Ehr wern die Kraft vun em Heiliche Geischt kriege, un ehr werrn vun mehr weiderverzehle." Ehr wern due, was ich du. Ehr wern an dem Reich vun unserem Herrgott baue. Ehr wern alle Mensche Hoffnung bringe, un ehr wern en zeiche, wie lieb unsern Herrgott allminanner hot, un am End werde de liewe Gott die ganz Welt nei mache.

4

Ob mer nit so e bissel Pingschde heit brauche kännden? In dene Wieschde vun unserm Lewe? Ob s do nit gut wär, wann emol so e Pingschtfescht aabreche deet?

Die Gschicht aus dere Wiescht am Berg Sinai sacht uns: Unserm Herrgott soin Geischt kummt dort zu soine Mensche, wo se sich grad am meischde verlosse fiehlen. Er kummt und helft en. Er bringt en e neies Lewe. Er zeigt en e neies Ziel fer ehr Lewe un fer die Welt. Wo s so aussieht, als wie wann alles feschtgfahre wär, do bringt unserem Herrgott soin Geischt alles in Bewegung. Wo all ehr Fliegel hänge lossen un ehrn Mut verlore hän, do weht uf äämol widder en frische Wind, do schoint die Sunn widder nei. Wo ach noch de letzschde die Hoffnung verliert, do kummt unserem Herrgott soin Geischt un steckt allminanner aa mit äner neie Kraft.

Ebbes ganz Wichdiches sacht uns die Gschicht ach noch: Unserm Herrgott soin Geischt sorcht defor, daß die Mensche beinanner sin un enanner helfen. Ään Mensch allää findt kaum die Kraft, daß er aus em Schneckehaus vun soiner Verzweiflung rauskummt. Awwer wo sich e paar zsammedun, daß se die Lascht vun ehrm Lewe minanner draachen, do kummt e bissel Hoffnung uf. "Gedääldi Lascht is halwi Lascht", sacht e Sprichwort. Do, wo nit jedi un jeder määnt, daß er fer sich allää es Lewe määschdre mißt, do, wo Mensche sich zsammefinnen un e bissel Aadääl nemmen anenanner, do werd es Lewe leichder. Do verännert sich die Welt. Do gilt nimmi die alt Ordnung: Jeder ist sich selwer de nächschde. Ich sorg fer mich, sollen die annere doch grad fer sich selwer sorche. Meer schenkt jo ach käner ebbes, un wie die Sprich all hääßen.

Do schoint ebbes uf vun äner neie Welt, vun unserem Herrgott soiner Welt. Do is ein neier Geischt in uns, unserem Herrgott soin Geischt. Un der sacht: Minanner, wann ehr eich umenenanner sorchen, wann ehr grad ach fer die Schwache sorchen, wann ehr gut seid zunanner, do werd die Welt nei.

Mer hän s doch all schun gemerkt, immer widder gemerkt: Do, wo mer es Lewe minanner däälen, do werd es Lewe schää, un mer hän s Gfiehl, s deet sich lohne. Dann werd des alles ganz newesächlich un klää, wo vorher so wichdich is: was mer besitze kann un konsumiere, aller Luxus un aller Reichdum. Dann werd des uf äämol wichdich, wo bleibt: daß mer gut zunanner is un aastännich, daß mer Freunde hot un enanner helfe kann, daß mer minanner in die Zukunft guckt un ebbes sich devun erhoffe dut. Dann is unserem Herrgott soin Geischt in uns am Werk. Er gebt uns Kraft, daß mer dorchhalden in de Wiescht, un er helft uns dorch und fiehrt uns raus.

Die alt Welt verliert dann ehr Kraft. Unserm Herrgott soi neii Welt brecht dann aa. Dort in de Wiescht am Berg Sinai. Sellemols in Jerusalem. Un heit bei uns, do, wo mer lewen. Amen.

Gebet

Liewer Gott, geb du uns in unser Welt doin Geischt, daß mer an dich glaawen un en Sinn finnen in unserm Lewe. Geb du uns in unser Welt doin Geischt, daß mer uns unnernanner liebhawwen un minanner verbunne sin. Geb du uns in unser Welt doin Geischt, daß mer die Hoffnung nit ufgewwen un e Ziel sehen fer unser Lewe un Mut finnen. Amen.

Dekan Dr. Werner Schwartz, Gartenstrasse 6, D- 67227 Frankenthal
Tel. 06233 - 880 80, privat 880 880, Fax 880 881
eMail werner.schwartz@t-online.de oder dekanat.frankenthal@t-online.de
künftig, ab August 2001: Evangelische Diakonissenanstalt, 67343 Speyer am Rhein
Telefon 06232 - 22 0 oder 22 1204, Fax 22 1587
eMail werner.schwartz@ev-diakonissenanstalt-speyer.de